The News Sponsor By
feature-top
feature-top

இப்போது கொரோனா பாதிப்பால் அமெரிக்காவில் வேலையின்மைப் பிரச்சினை முன்னெப்போதும் இல்லாத அளவுக்கு அதிகரித்திருக்கும் சூழலில் மற்ற நாட்டவர்களுக்கான வேலைவாய்ப்புகளை அமெரிக்கா பறித்து வருகிறது. அமெரிக்காவில் வேலைபார்க்கும் மற்ற நாட்டைச் சேர்ந்தவர்களுக்கு வழங்கப்படும் பல்வேறு வேலைவாய்ப்பு தொடர்பான விசாக்களுக்கு அமெரிக்க அரசு தடை விதித்துள்ளது.


அமெரிக்காவின் வேலைவாய்ப்பு விசாக்களில் மிகவும் முக்கியமான விசா H-1B விசா ஆகும். அமெரிக்கா வழங்கும் H-1B விசாக்களில் சுமார் 70 சதவிகித விசாக்களை இந்தியர்கள்தான் வாங்குகின்றனர். அதுவும் இந்தியத் தகவல் தொழில்நுட்பத் துறையினர்தான் இந்த H-1B விசாக்களை வாங்கி அமெரிக்காவில் வேலைபார்க்கின்றனர்.


அமெரிக்க அரசின் இந்தத் தடை உத்தரவால் இந்திய ஐடி துறையினரின் எதிர்காலம் கேள்விக்குறியாகியுள்ளது. அமெரிக்க அரசின் இந்தத் தடை உத்தரவுக்கு இந்திய ஐடி நிறுவனங்கள் தரப்பில் எதிர்ப்புகள் வரவில்லை. மாறாக, விசா மூலம் ஊழியர்களை அமர்த்துவதை விடுத்து உள்நாட்டில் உள்ள ஊழியர்களை ஐடி நிறுவனங்கள் அதிகம் பயன்படுத்தும் என்று கருதப்படுகிறது.


அமெரிக்காவில் இனி இந்திய ஐடி தொழிலாளர்களுக்கான வேலைவாய்ப்புகள் மந்தமாகியுள்ளதால் மாற்று வாய்ப்புகளில் கவனம் செலுத்தத் தொடங்கியுள்ளனர். கனடாவில் வேலைவாய்ப்புகள் பெறுவதையும், குடியேறுவதையும் இந்தியப் பொறியாளர்கள் எதிர்நோக்கியுள்ளனர்.


கனடவிற்கான வேலைவாய்ப்பு நிறுவனங்களுக்குக் கடந்த இரண்டு வாரங்களில் மட்டும் இந்தியர்கள் தரப்பிலிருந்து வேலைவாய்ப்புகளுக்கு விண்ணப்பிக்கப்பட்டுள்ளது. கடந்த சில தினங்களாகவே கனடாவில் வேலைவாய்ப்புக்கான விண்ணப்பங்கள் அதிகமாக வந்துள்ளதாக மாப்ஸ்குவாடு வேலைவாய்ப்பு நிறுவனத்தின் தலைமைச் செயலதிகாரியான இர்ஃபான் ராவ்ஜி தெரிவித்துள்ளார்.


அமெரிக்காவின் விசா தடை அறிவிப்பைத் தொடர்ந்து கனடாவில் குடிபெயர்தல் அதிகரிக்கும் எனவும், அதற்கான திட்டம் வகுத்துள்ளதாகவும் கனடாவின் குடிபெயர்வுத் துறை அமைச்சர் மார்கோ மெண்டிசினோ கூறியுள்ளார்.


கொரோனா பிரச்சினை வருவதற்கு முன்பு, கனடாவில் 2020 முதல் 2022 வரையில் 10 லட்சம் பேரைப் பிற நாடுகளிலிருந்து கனடாவுக்குக் குடியேற கனட அரசு இலக்கு வைத்திருந்தது. இந்த ஆண்டின் முதல் இரண்டு மூன்று மாதங்களில் கிட்டத்தட்ட 74,000 பேர் கனடாவில் குடியேறியுள்ளனர். அதில் 24 சதவீதத்தினர் இந்தியர்களாவர்.

Share This News
feature-top
feature-top